“AzerGold” Özbəkistanda “Akba” qızıl yatağının işlənməsi perspektivlərini açıqlayıb
“AzerGold” QSC-nin İdarə Heyətinin sədri Zakir İbrahimov Özbəkistan Prezidenti Şavkat Mirziyoyevin Qaşqadərya vilayətində xarici investorlarla keçirilən görüşündə çıxış edib.
QSC-dən verilən məlumata görə, Zakir İbrahimov “AzerGold Uzbekistan” qurumunun fəaliyyəti və “Akba” qızıl yatağının işlənməsi layihəsi barədə məlumat verib. Qeyd olunub ki, ilkin mərhələdə geoloji kəşfiyyata 7,8 milyon dollar investisiya yatırılması planlaşdırılır, növbəti investisiyaların həcmi isə azı 100 milyon dollar təşkil edəcək. 200 yeni iş yerinin yaradılması potensialına malik layihə üzrə yekun investisiya qərarının 2028-ci ildə qəbul edilməsi gözlənilir.
Qeyd edək ki, 17 iyul 2026-cı il tarixində “AzerGold”, “Uzbekgeologorazvedka” SC və Azərbaycan-Özbəkistan İnvestisiya Şirkəti arasında imzalanan üçtərəfli saziş çərçivəsində Nəvai və Nurata şəhərləri arasında yerləşən sahələrdə geoloji kəşfiyyat tədqiqatlarının aparılması istiqamətində işlər davam etdirilir. Eyni zamanda, tərəflər Azərbaycan və Özbəkistanda yerləşən digər perspektivli mineral yataqlarının birgə kəşfiyyatı və işlənməsi imkanlarını müzakirə edirlər.
