Super-elit toxum istehsal edən fermerlərə əlavə subsidiyaların ödənilməsinə başlanılır

Yerli toxumçuluğun inkişafını stimullaşdırmaq məqsədilə super-elit toxum istehsal edən fermerlərə əlavə subsidiyaların ödənilməsinə başlanılır.

Kənd Təsərrüfatı Nazirliyinin məlumatına görə, yeni mexanizmə əsasən, yerli mənşəli super-elit buğda və arpa toxumu istehsal edən fermerlərə hər hektara görə 470 manat, xarici mənşəli super-elit toxum istehsalçılarına isə 300 manat əlavə əkin subsidiyası veriləcək.

Fermerlərin sertifikatlı toxum əldə etməsini asanlaşdırmaq üçün Aqrar Xidmətlər Agentliyi tərəfindən toxum istehsalçıları haqqında məlumat bazası yaradılıb.

Sertifikatlı toxumdan istifadə tələbinə əməl edilməməsi isə subsidiya ödənişlərinin azaldılması ilə nəticələnəcək. Yeni qaydalara görə, minimum 5 hektar sahəsi olan və 2026–2027-ci il əkin mövsümündə sertifikatlı toxumdan istifadə etməyən fermerlərin əkin subsidiyası 50 faiz azaldılacaq. 2027–2028-ci il mövsümündən etibarən isə bu tələbi ödəməyən fermerlər üçün subsidiya əmsalı sıfır qəbul ediləcək.

Bu tədbirlərin əsas məqsədi ölkədə keyfiyyətli toxum istehsalını genişləndirmək və məhsuldarlığı artırmaqdır.