AIIB və ADB Xəzərdə dəniz külək enerjisinin sahil infrastrukturu konsepsiyasını maliyyələşdirəcəklər
157 QVt texniki külək potensialına malik Xəzər dənizinin Azərbaycana mənsub hissəsində 711,4 kvadratkilometr su sahəsi bərpaolunan enerji mənbələri ərazisi kimi müəyyən edilib.
Bu barədə energetika naziri Pərviz Şahbazovun “Müasir Azərbaycanın enerji siyasəti: milli enerji təhlükəsizliyindən qlobal enerji tərəfdaşlığına” adlı məqaləsində bildirilir.
Qeyd edilib ki, formalaşdırılan hüquqi baza çərçivəsində Energetika Nazirliyi və “Clean Energy Capital” MMC arasında ilkin mərhələdə 200 MVt, ümumilikdə isə 600 MVt gücündə dəniz külək enerjisi layihəsinin reallaşdırılması üzrə İcra Müqaviləsi imzalanıb. Hazırda layihə üzrə külək, dalğa və dəniz axınlarının öyrənilməsi məqsədilə müasir ölçmə avadanlıqları vasitəsilə tədqiqatlar aparılır.
Layihənin sahil infrastrukturu konsepsiyasının hazırlanmasına AIIB və ADB tərəfindən 200 min dollar maliyyə ayrılması planlaşdırılır. Dünya Bankı ilə iş birliyi çərçivəsində isə külək turbini komponentlərinin yerli istehsalı və neft-qaz mühəndisliyi təcrübəsinin bu sahəyə tətbiqi imkanları qiymətləndirilir. Bu layihələr yerli sənaye, liman, gəmiçilik və logistikanın inkişafına, eləcə də Xəzərin yaşıl enerji resurslarının ixracına xidmət edəcək.
