Azərbaycan və Vyetnam neft-qaz, yaşıl enerji və tranzit sahələrində tərəfdaşlığı müzakirə ediblər
Energetika naziri Pərviz Şahbazov Vyetnamın sənaye və ticarət nazirinin müavini Fan Thi Thanq ilə görüşündə iki ölkə arasında siyasi, iqtisadi və enerji əlaqələrinin strateji tərəfdaşlıq müstəvisində inkişafını müzakirə edib.
Nazirlikdən verilən məlumata görə, görüşdə neft-qaz sektorunda 2023-cü ildən bəri Vyetnama 1,1 milyon tondan çox Azərbaycan xam neftinin tədarük edildiyi vurğulanıb, SOCAR və “PetroVietnam” arasında əməkdaşlığın genişləndirilməsi, neft emalı, yataqların işlənilməsi və LNG tədarükü perspektivləri nəzərdən keçirilib.
Bərpaolunan enerji sahəsində Vyetnamın “ROX Group” şirkəti ilə Naxçıvanda günəş, Bakı ətrafında isə külək elektrik stansiyalarının tikintisi layihələrinin növbəti mərhələyə keçirilməsi diqqət mərkəzində olub.
Həmçinin qeyri-neft ticarətinin və qarşılıqlı investisiyaların artırılması, İşgüzar Şuranın növbəti iclasının təşkili, kadr hazırlığı və nəqliyyat-tranzit sahəsindəki uğurlar qeyd edilib. Xüsusilə Azərbaycan üzərindən Vyetnamla əlaqəli tranzit daşımalarının 2025-ci ildə 200 faizdən çox, 2026-cı ilin 9 ayında isə təxminən 600 faiz artdığı diqqətə çatdırılıb.
