Bakı Fond Birjasının (BFB) İdarə Heyətinin sədri Ruslan Xəlilov və Çilinin Azərbaycandakı səfirliyinin müvəqqəti işlər vəkili Xuan Karlos Salazar Alvares iki ölkənin maliyyə bazarları sahəsindəki təcrübəsini, kapital bazarlarının inkişaf istiqamətlərini və beynəlxalq təcrübənin öyrənilməsi imkanlarını müzakirə ediblər.

BFB-nin məlumatına görə, tərəflər həmçinin Santyaqo Fond Birjasının (Bolsa de Comercio de Santiago) fəaliyyəti və Çili kapital bazarının inkişafı üzrə təcrübə mübadiləsi imkanlarını nəzərdən keçiriblər.

Görüş qarşılıqlı məlumat mübadiləsi və maliyyə bazarlarının inkişafına dair təcrübənin bölüşülməsi baxımından mühüm əhəmiyyət kəsb edib.