Manotonq Vonqsay: “Azərbaycan Cənub-Şərqi Asiya bazarlarına çıxış əldə edə bilər”

Azərbaycanın geniş nəqliyyat infrastrukturu beynəlxalq ticarətin inkişafına təkan verir. Avropa ilə Asiya arasında yerləşən Azərbaycan öz limanları vasitəsilə Cənub-Şərqi Asiya bazarlarına çıxış əldə edə bilər. Azərbaycanın logistika imkanları iki ölkə arasında ticarət əlaqələrinin genişləndirilməsi, logistika zəncirlərinin təkmilləşdirilməsi və iqtisadi əməkdaşlığın dərinləşdirilməsi üçün yeni perspektivlər yarada bilər.

Bu sözləri Laosun sənaye və ticarət nazirinin müavini Manotonq Vonqsay Bakıda keçirilən Azərbaycan-Laos Biznes Forumunda çıxışı zamanı deyib.

Onun sözlərinə görə, Laosun dənizə çıxışı olmasa da regionda bazarları birləşdirən imkana malikdir.

“Bu baxımdan Laosun regional bağlantı konsepsiyası Çinin “Bir kəmər, bir yol” təşəbbüsü ilə uzlaşır. Laos-Çin dəmir yolu magistralı bu konsepsiyanın reallaşdırılmasında əhəmiyyətli nailiyyətdir. O, paralel olaraq qonşu dövlətlər, regional bazarlarla nəqliyyat əlaqələrini gücləndirərək iki ölkə arasında sərnişin və yük daşımalarında əsas rol oynayır. Qlobal xarakter daşıyan layihələrin həyata keçirilməsi ölkələrin həm iqtisadi, həm də siyasi qüdrətinin artmasında böyük rol oynayır”, - deyə Manotonq Vonqsay əlavə edib.

AZƏRTAC