Azərbaycan–Kamboca Biznes Forumu keçirilib YENİLƏNİB

12 Oktyabr 2026 17:35

“Kamboca Krallığının Baş naziri Samdeç Moha Borvor Thipadei Hun Manetin iştirakı ilə keçirilən Azərbaycan–Kamboca Biznes Forumunda ölkələrimiz arasında iqtisadi əlaqələrin inkişafı, ticarət və investisiya əməkdaşlığının genişləndirilməsi imkanlarını müzakirə etdik.

Sənaye, kənd təsərrüfatı, enerji, turizm, maliyyə və informasiya texnologiyaları sahələrini təmsil edən işgüzar dairələrlə yeni tərəfdaşlıq perspektivlərini dəyərləndirdik. Ölkələrimizin biznes və investisiya imkanlarına dair təqdimatlar və B2B görüşlər yeni biznes əlaqələrinin qurulması və birgə layihələrin həyata keçirilməsi imkanlarının müzakirəsi üçün faydalı platforma oldu.

Forum çərçivəsində Azərbaycan Ticarət və Sənaye Palatası ilə Kamboca Ticarət Palatası arasında əməkdaşlığa dair Anlaşma Memorandumu mübadilə edildi”.

Bu barədə iqtisadiyyat naziri Mikayıl Cabbarov sosial media hesablarında paylaşım edib.

-----

16:30

Biznes-forum İqtisadiyyat Nazirliyinin təşkilatçılığı ilə baş tutub.

Tədbirdə hər iki ölkənin rəsmi şəxsləri ilə yanaşı, sənaye, kənd təsərrüfatı, tikinti, maliyyə, turizm, səhiyyə, informasiya texnologiyaları və digər sahələrdə fəaliyyət göstərən iş adamları iştirak edirlər.