Bakıda energetika naziri Pərviz Şahbazov və Böyük Britaniya və Şimali İrlandiya Birləşmiş Krallığının Biznes, İnnovasiya, Elm və Ticarət Nazirliyinin Ticarət üzrə dövlət naziri Lord Anas Sarvarın həmsədrliyi ilə Azərbaycan-Böyük Britaniya Hökumətlərarası Komissiyasının 8-ci iclası keçirilib.

Energetika Nazirliyindən verilən məlumata görə, iclasda ticarət, enerji, rəqəmsal infrastruktur, nəqliyyat və humanitar sahələrdə əməkdaşlığın inkişafı diqqət mərkəzində olub. Vurğulanıb ki, 39 milyard ABŞ dollarından çox investisiya ilə Birləşmiş Krallıq ölkəmizin ən böyük xarici investorudur və bu ilin ilk yarısında ikitərəfli ticarət dövriyyəsi 5,5 dəfə artaraq 3,6 milyard dollara çatıb. Tərəflər "bp" şirkəti ilə birgə layihələri, gələn il istismara veriləcək 240 MVt gücündə "Şəfəq" Günəş Elektrik Stansiyasını, yaşıl enerji dəhlizlərini və Orta Dəhliz boyunca Böyük Britaniyanın İxrac Kredit Agentliyinin iştirakı imkanlarını müzakirə ediblər.

Tədbirin sonunda yaşıl enerji, nəqliyyat və digər istiqamətləri əhatə edən 4 əməkdaşlıq sənədi, iclasın Protokolu və 10 istiqamət üzrə 60-dan çox tədbiri özündə ehtiva edən 2026-2027-ci illər üçün Fəaliyyət Planı qəbul olunub.