Rusiya Federasiyası hökumətinin sədr müavini Aleksey Overçuk və Azərbaycan Respublikası Baş nazirinin müavini Şahin Mustafayev Rusiya ilə Azərbaycan arasında İqtisadi Əməkdaşlıq üzrə Hökumətlərarası Komissiyanın həmsədrlərinin görüşünü keçiriblər.

Rusiya Federasiyası hökumətinin məlumatına görə, tədbirdə hər iki ölkənin aidiyyəti qurumlarının, nazirlik və idarələrinin nümayəndələri iştirak ediblər.

Tərəflər ticarət-iqtisadi və investisiya sahələrində, sənaye, energetika, kənd təsərrüfatı, nəqliyyat və logistika istiqamətlərində qarşılıqlı fəaliyyət məsələlərini ətraflı nəzərdən keçiriblər. İştirakçılar yüksək səviyyədə əldə olunan razılaşmaların və komissiyanın 24-cü iclasının qərarlarının icrası gedişatını müzakirə ediblər.

Qarşılıqlı ticarət dövriyyəsinin artırılması, əlaqələrin genişləndirilməsi və iki ölkənin təsərrüfat subyektlərinin fəaliyyəti üçün əlverişli şəraitin yaradılması üzrə növbəti tədbirlər nəzərdən keçirilib. Tərəflər nəqliyyat əlaqələrinin inkişafına, yük daşımalarının genişləndirilməsinə, "Şimal-Cənub" Beynəlxalq Nəqliyyat Dəhlizindən bundan sonra da istifadə olunmasına və buraxılış məntəqələrinin işinin təkmilləşdirilməsinə xüsusi diqqət ayırıblar.

Bundan əlavə, Azərbaycan və Rusiya üçün praktiki maraq kəsb edən layihələrin reallaşdırılması perspektivləri ətrafında fikir mübadiləsi aparılıb. Tərəflər iqtisadi qarşılıqlı fəaliyyətin əsas istiqamətləri üzrə birgə işin davam etdirilməsinin vacibliyini vurğulayıblar.