İKZF vəsaiti hesabına müvəkkil banklar tərəfindən 4 milyard manatdan çox ipoteka krediti verilib

İndiyədək İpoteka və Kredit Zəmanət Fondunun vəsaiti hesabına müvəkkil banklar tərəfindən 4 milyard 92 milyon manat məbləğində 60 016 ipoteka krediti verilib.

Fondun məlumatına görə, bu məbləğin 2 milyard 966 milyon manatı və ya 41 013-ü adi ipoteka kreditinin, 1 milyard 126 milyon manatı və ya 19 003-ü güzəştli ipoteka kreditlərinin payına düşüb.

Eyni zamanda şəxsi yığımları yetərli olmayan əhalinin daha aşağı ilkin ödənişlə ipoteka kreditlərindən faydalanmasını təmin etmək məqsədilə Fond tərəfindən 156,6 milyon manat məbləğində 1624 ipoteka krediti üzrə zəmanət verilib.

Fondun vəsaiti hesabına verilən ipoteka kreditlərindən faydalananların 67 faizini gənclər və gənc ailələr təşkil edib.