Mikayıl Cabbarov: "Bizim hədəfimiz daha yüksək əlavə dəyərə malik məhsul və xidmətlər yaratmaqdır"
“Bizim hədəfimiz Azərbaycan iqtisadiyyatının mürəkkəblik səviyyəsinin artırılmasına nail olmaqdır. Bunu daha sadə dillə ifadə etsək, söhbət yalnız daha çox məhsul istehsal etməkdən deyil, daha yüksək əlavə dəyərə malik məhsul və xidmətlər yaratmaqdan gedir”.
Bunu Baku ID 2026 tədbiri çərçivəsində keçirilən “Dördüncü Sənaye İnqilabı dövründə bacarıqlar üzrə prioritetlərin müəyyənləşdirilməsində dövlət-özəl sektor arasında əməkdaşlığın gücləndirilməsi” mövzusunda panel sessiyasında çıxış edən iqtisadiyyat naziri Mikayıl Cabbarov deyib.
Nazirin sözlərinə görə, bu istiqamətdə əsas amil istedad, texnologiya və ekosistemin vəhdətidir. Bu prosesin mərkəzində insan və insan kapitalı dayanır.
“Təhsilin və innovasiyanın, real iqtisadi iştirakçıların və tələbin, eləcə də əlverişli dövlət siyasəti və tənzimləyici çərçivənin bir araya gəldiyi ekosistem mövcud olduqda yeni təşəbbüslər, həllər və nəticələr ortaya çıxır”, - Mikayıl Cabbarov qeyd edib.
