Qazaxıstanın paytaxtı Astanada Türk Ticarət və Sənaye Palataları Birliyinin (TCCI) rəhbərlərinin növbədənkənar iclası keçirilib.

Azərbaycan Sahibkarlar Konfederasiyasının məlumatına görə, iclasda TCCI-yə üzv dövlətlərin ticarət və sənaye palatalarının rəhbərləri, dövlət qurumlarının, Türk Dövlətləri Təşkilatının və Türk İnvestisiya Fondunun nümayəndələri iştirak ediblər. Ölkəmizi tədbirdə ASK-nın vitse-prezidenti Vüqar Zeynalov təmsil edib.

Gündəliyin əsas mövzuları TCCI-nin daha əvvəl qəbul etdiyi qərarların icrası, Türk Dövlətləri Təşkilatının Dövlət Başçıları Sammitinə təkliflərin hazırlanması və birliyin institusional inkişafı olub. Həmçinin vahid investisiya portfelinin formalaşdırılması, ortaq elektron ticarət və ixrac platformasının yaradılması, eləcə də biznesin qarşılıqlı fəaliyyəti üçün rəqəmsal alətlərin tətbiqi müzakirə olunub.

Qeyd edək ki, bu il Qazaxıstan Türk Ticarət və Sənaye Palataları Birliyinə sədrlik edir.