Mərkəzi Bank BMT-nin İnkişaf Proqramının Dayanıqlı Sığorta Forumuna üzv qəbul olunub
Azərbaycan Mərkəzi Bankı (AMB) Birləşmiş Millətlər Təşkilatının İnkişaf Proqramının Dayanıqlı Sığorta Forumuna (Sustainable Insurance Forum – SIF) üzv qəbul olunub.
AMB-nin məlumatına görə, Mərkəzi Bank bu üzvlük çərçivəsində dünyanın müxtəlif ölkələrinin sığorta nəzarətçiləri və tənzimləyiciləri ilə əməkdaşlığı genişləndirmək, beynəlxalq təcrübə və bilik mübadiləsində iştirak etmək, eləcə də forumun işçi qrupları və müzakirələrində təmsil olunmaq imkanı əldə edib. Bununla da, Mərkəzi Bank sığorta sektorunda dayanıqlılığın və iqlim risklərinə qarşı davamlılığın gücləndirilməsi ilə bağlı beynəlxalq təşəbbüslərə töhfə verə, həmçinin qabaqcıl beynəlxalq təcrübənin ölkənin sığorta sektorunun inkişafında tətbiqi imkanlarını genişləndirə biləcək.
Qeyd edək ki, Birləşmiş Millətlər Təşkilatının təşəbbüsü, Beynəlxalq Sığorta Nəzarətçiləri Assosiasiyasının dəstəyi ilə 2016-cı ildə yaradılan Forum sığorta sektorunda dayanıqlılıq məsələlərinin, o cümlədən iqlim dəyişiklikləri ilə bağlı risklərin sığorta nəzarəti çərçivəsində nəzərə alınması üzrə beynəlxalq əməkdaşlıq və təcrübə mübadiləsi platformasıdır. Forum sığorta tənzimləyiciləri və nəzarət orqanlarını bir araya gətirməklə, dayanıqlı inkişaf sahəsində sektorun üzləşdiyi kritik çağırışların aradan qaldırılması istiqamətində birgə fəaliyyəti təşviq edir.
