Texnoloji transformasiya artıq sadəcə proseslərin rəqəmsallaşdırılması deyil - məhsuldarlığın, çevikliyin, keyfiyyətin və enerji səmərəliliyinin yüksəldilməsi üçün real biznes alətidir.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) məlumatına görə, Dünya İqtisadi Forumunun “Qlobal Mayak” Şəbəkəsi (Global Lighthouse Network) üzrə 2025-ci il nəticələrinə əsasən, qabaqcıl istehsal müəssisələrində süni intellekt, maşın öyrənməsi, qabaqcıl analitika, əşyaların interneti (IoT) və digər 4-cü sənaye inqilabı texnologiyalarının tətbiqi orta hesabla əmək məhsuldarlığının 40 faiz artmasına, istehsal və çatdırılma müddətinin 48 faiz azalmasına səbəb olub. Texnoloji həllər eyni zamanda məhsul qüsurlarını 41 faiz, enerji sərfiyyatını isə 28 faiz azaldıb.

Azərbaycan üçün bu transformasiyanın real nəticələrini göstərən nümunələr də mövcuddur. 2026-cı ildə SOCAR Karbamid zavodu Dünya İqtisadi Forumunun “Qlobal Mayak” Şəbəkəsinə qəbul olunub. Müəssisədə 42 rəqəmsal həllin tətbiqi nəticəsində istehsal gücü 21 faiz, təbii qazdan istifadə səmərəliliyi isə 24 faiz yüksəlib.