Azərbaycan sahibkarları Monqolustanda keçiriləcək beynəlxalq biznes forumuna dəvət olunur

30 sentyabr – 1 oktyabr 2026-cı il tarixlərində Monqolustanın paytaxtı Ulan-Bator şəhərində “CAREC Biznes Forumu 2026” təşkil ediləcək.

Azərbaycan Sahibkarlar Konfederasiyasının məlumatına görə, Asiya İnkişaf Bankı və CAREC Proqramının (Mərkəzi Asiya Regional İqtisadi Əməkdaşlıq Proqramı) birgə təşkilatçılığı ilə 25-ci CAREC Nazirlər Konfransı çərçivəsində baş tutacaq bu nüfuzlu tədbir, üzv ölkələrdən özəl sektor nümayəndələrini, dövlət rəsmilərini, biznes assosiasiyalarını və investorları özündə birləşdirən 250-yə yaxın iştirakçını bir araya gətirəcək.

“İnvestisiyaların Artırılması — İnfrastruktur Transformasiyasının İdarə edilməsi” mövzusuna həsr olunacaq forum çərçivəsində bir sıra prioritet sektorlar üzrə geniş müzakirələr aparılacaq.

Tədbirin gündəliyinə kritik minerallar sahəsində dəyər zəncirlərinin inkişafı və emal sənayesi, yaşıl enerji istiqamətində bərpaolunan enerji mənbələri, regional enerji ticarəti və ağıllı şəbəkələr, həmçinin rəqəmsal və yaşıl nəqliyyat həlləri, çoxməqsədli inteqrasiya və dəhlizlərin inkişafını əhatə edən ağıllı nəqliyyat və logistika məsələləri daxil edilib.

Forumun ikinci günü, oktyabrın 1-də investisiya imkanlarını dəyərləndirmək, yeni tərəfdaşlıqlar qurmaq və beynəlxalq bazarlara çıxış əldə etmək məqsədilə B2B və B2G formatında görüşlərin keçirilməsi nəzərdə tutulub.