"Euronews" telekanalında Qarabağda bərpa işlərindən iqtisadi inkişafın yeni mərhələsinə keçidə, investisiya cəlb edən yeni sənaye və logistika zonalarına həsr olunmuş "Regionun bərpası investisiyaları, sənayeni və yeni imkanları stimullaşdırır" adlı süjet yayımlanıb. Materialda qeyd olunur ki, Ağdam və Cəbrayıl rayonlarında yeni iqtisadi zonalar istehsal, sənaye və logistika ətrafında formalaşır, onların inkişafı isə biznes və investisiyaları cəlb etmək məqsədi daşıyan vergi güzəştləri ilə dəstəklənir. Azərbaycan Respublikası Prezidentinin Şuşa rayonunda xüsusi nümayəndəsi bildirib ki, məqsəd uzunmüddətli inkişafa yönəlmiş regionun formalaşdırılmasıdır. Eyni zamanda, onun bərpasında iştirak edən Şuşa Şəhəri Dövlət Qoruğunun baş memarı qarşıda duran vəzifəni “demək olar ki, sıfırdan” başlamaq kimi xarakterizə edib. Bərpa olunan enerji mənbələrindən səmərəli istifadədən və rəqəmsal planlaşdırmadan tutmuş, dronlarla aerofotoçəkiliş və müasir xəritəçəkmə texnologiyalarına qədər bütün proseslər regionun gələcəyə uyğun şəkildə yenidən qurulması məqsədinə xidmət edir.