Avqust ayında Kiçik və Orta Biznesin İnkişafı Agentliyinin (KOBİA) təşkilatçılığı ilə Bakı, Mingəçevir, Kəlbəcər, Lənkəran, Şəki, Samux, Xaçmaz və Naxçıvan Muxtar Respublikasının Culfa rayonunda sahibkarlar üçün müxtəlif mövzularda sahəvi görüşlər təşkil olunacaq.

KOBİA-nın məlumatına görə, onlayn və oflayn formatlarda baş tutacaq görüşlər balıqçılıq və akvakultura məhsullarının istehsalı və emalı, ISO standartları və keyfiyyətin idarə edilməsi, heyvandarlıq və arıçılığın inkişafı, özünüməşğulluq proqramının yaratdığı biznes imkanları, turizm, kiçik həcmli qayıqların istehsalı və istismarı, rəqəmsal həllərin biznesdə tətbiqi, istixana fəaliyyəti, kommunal xidmətlərə qoşulma, eləcə də karbon izinin azaldılması mövzularını əhatə edəcək.

Görüşlərdə KOBİA-nın və aidiyyəti dövlət qurumlarının nümayəndələri sahibkarlıq fəaliyyəti ilə bağlı son yeniliklər, müvafiq sahələrdəki imkanlar və dövlət dəstəyi mexanizmləri barədə ətraflı məlumat verəcək, biznes subyektlərini maraqlandıran sualları cavablandıracaqlar.

Sahibkarlar avqust ayında keçiriləcək sahəvi görüşlər və maarifləndirmə tədbirləri barədə ətraflı məlumatla aşağıdakı keçid vasitəsilə tanış ola bilərlər: https://smb.gov.az/az/events?slug=gorus