Bakıda Əməkdaşlıq Xartiyası (CoC) üzrə Texniki Komitənin ilk iclası keçirilib

Bu gün Bakıda OPEC+ çərçivəsində Əməkdaşlıq Xartiyası (CoC) üzrə Texniki Komitənin ilk iclası keçirilib.

Energetika Nazirliyindən verilən məlumata görə, Azərbaycanın ev sahibliyi ilə təşkil olunan iclasa OPEC-in Baş katibi Haysam Əl-Qays sədrlik edib. Neft hasil edən 20 ölkənin nümayəndələrini bir araya gətirən tədbirdə bazarın fundamental amilləri, enerji dialoqu, texnologiya, innovasiya, investisiyalar, siyasət və tənzimləmə, eləcə də sənaye standartları ilə bağlı fəaliyyət və proqramları əhatə edən Əməkdaşlıq Xartiyasının (CoC) hərtərəfli iş planı müəyyən edilib. İş planında gələcək fəaliyyətlər, təşəbbüslər və iclaslar öz əksini tapıb.

İclas 2025-ci ilin noyabrında keçirilən OPEC və qeyri-OPEC ölkələrinin 40-cı nazirlər iclasında əldə olunan qərarların davamı olaraq təşkil edilib. Həmin toplantıda Əməkdaşlıq Xartiyasının (CoC) çərçivəsi təsdiqlənmiş və OPEC Katibliyinə Xartiyanın məqsədlərinin tam reallaşdırılmasını təmin etmək üçün plan hazırlamaq və onu proqramlara çevirmək tapşırılmışdı.

Qeyd edək ki, Əməkdaşlıq Xartiyası 2 iyul 2019-cu il tarixində keçirilmiş OPEC-ə üzv və qeyri-üzv ölkələrin nazirlərinin 6-cı iclasında Əməkdaşlıq Bəyannaməsinin iştirakçısı olan OPEC və qeyri-OPEC ölkələri tərəfindən imzalanıb. Xartiyanın imzalanması Əməkdaşlıq Bəyannaməsinin uğurunun yaratdığı müsbət dinamikanı tamamlayaraq əməkdaşlığın yeni mərhələsinin əsasını qoyub. 2025-ci ilin fevral ayında Əməkdaşlıq Bəyannaməsinə qoşulan Braziliya da daxil olmaqla Əməkdaşlıq Bəyannaməsinin bütün iştirakçıları Əməkdaşlıq Xartiyasının üzvləridir.