Vyanada keçirilən “OPEC Fund Development Forum 2026” forumu çərçivəsində “Bank Respublika” ASC və OPEC Beynəlxalq İnkişaf Fondu Azərbaycanın özəl sektorunun dəstəklənməsinə yönələn 20 milyon dollar məbləğində dördillik kredit sazişi imzalayıblar.

Bankın məlumatına görə, sənədi iqtisadiyyat nazirinin müavini Anar Axundov və Azərbaycanın Avstriyadakı səfiri Rövşən Sadıqbəylinin iştirakı ilə “Bank Respublika”nın İdarə Heyətinin sədri Tariyel İsmayılov və OPEC Fondunun prezidenti Əbdülhəmid Əlxəlifə imzalayıblar.

Cəlb olunan vəsaitlər mikro, kiçik və orta biznes subyektlərinin maliyyəyə çıxışının genişləndirilməsinə yönəldiləcək ki, bu da yeni iş yerlərinin yaradılması, biznes mühitinin yaxşılaşdırılması və dayanıqlı iqtisadi artım üçün stimul olacaq.