Bu ilin yanvar–may ayları ərzində Naxçıvan Muxtar Respublikası Sahibkarlığın İnkişafı Fondu tərəfindən sahibkarlara ümumilikdə 2,9 milyon manat güzəştli maliyyə dəstəyi göstərilib.

Muxtar Respublikanın İqtisadiyyat Nazirliyinin məlumatına görə, bu vəsait 84 layihənin maliyyələşdirilməsinə yönəldilib. Ötən ilin eyni dövrü ilə müqayisədə maliyyələşdirilən layihələrin sayı 29,2 faiz artıb ki, bunun hesabına 142 yeni iş yerinin yaradılması nəzərdə tutulur.

Hesabat dövründə güzəştli kredit məbləğinin 56,7 faizi kənd təsərrüfatı, 28,4 faizi xidmət, 14,9 faizi isə sənaye sahələrinə yönəldilib. Maliyyələşdirilən layihələrin 91,7 faizi, güzəştli kredit məbləğinin isə 68,1 faizi regionlarda fəaliyyət göstərən sahibkarlıq subyektlərinin payına düşüb.