Naxçıvanda dövlət əmlakının icarəsindən büdcəyə daxilolmalar 26,2 faiz artıb

2026-cı ilin yanvar-may aylarında Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidməti tərəfindən daşınmaz dövlət əmlakının icarəyə verilməsinə dair 99 yeni icarə müqaviləsi bağlanılıb ki, bunlardan 68-i qeyri-yaşayış, 31-i isə torpaq sahələrinə aid olub. 93 icarə müqaviləsinin müddəti uzadılıb.

Nazirliyin məlumatına görə, qüvvədə olan müqavilələr üzrə dövlət büdcəsinə qeyri-yaşayış və torpaq sahələrinin icarəsindən ümumilikdə 357 min manata yaxın vəsait ödənilib. Ötən beş ayda dövlət büdcəsinə daxilolmalar 2025-ci ilin eyni dövrü ilə müqayisədə 26,2 faiz artıb.

Bununla yanaşı, hesabat dövründə muxtar respublikada 4729 daşınmaz əmlak üzərində mülkiyyət hüququ dövlət qeydiyyatına alınıb ki, bu da bir il öncəki göstəricini 12,8 faiz üstələyir.

Qeydiyyata alınan əmlaklardan 2094-ü torpaq sahəsi, 1790-ı fərdi yaşayış və bağ evi, 598-i mənzil, 122-si qeyri-yaşayış sahəsi, 118-i qeyri-yaşayış binası, 7-si isə əmlak kompleksidir.

Cari ilin ötən dövründə daşınmaz əmlakın qeydiyyatı, texniki inventarlaşdırılması və kadastr xidmətlərindən ümumilikdə 986 min manat xidmət haqqı toplanıb. Bu da əvvəlki ilin müvafiq dövrü ilə müqayisədə 25,6 min manat və ya 2,6 faiz çoxdur.