Azərbaycan İslam İnkişaf Bankı ilə əməkdaşlığa xüsusi önəm verir. Bank müstəqillik illərindən etibarən ölkəmizin sosial-iqtisadi inkişafına dəstək göstərib. Azərbaycan artıq 30 ildən çoxdur ki, İslam İnkişaf Bankının üzvüdür və bu müddət ərzində tərəfdaşlıq münasibətləri uğurla inkişaf edib.

Bunu iqtisadiyyat naziri Mikayıl Cabbarov İslam İnkişaf Bankı (İİB) Qrupunun 51-ci İllik Toplantıları çərçivəsində keçirilən bağlanış mətbuat konfransında çıxışı zamanı deyib.

“İslam İnkişaf Bankı tərəfindən bu günədək Azərbaycanda ümumi dəyəri 1,8 milyard dollar olan maliyyələşdirmə əməliyyatları həyata keçirilib. Bu layihələrin böyük əksəriyyəti artıq uğurla başa çatdırılıb. Hazırda isə ümumi dəyəri 640 milyon dollar təşkil edən 11 layihə icra mərhələsindədir”, - deyə nazir qeyd edib.

Nazir İslam İnkişaf Bankı Qrupunun sədri Məhəmməd Süleyman Əl-Casiri İİB Qrupunun növbəti dövr üçün sədri seçildiyinə görə təbrik edib və Azərbaycanla tərəfdaşlıqda uğurlar arzu edib.

AZƏRTAC