İyunun 16-də Qarabağ iqtisadi rayonunda Azərbaycan Respublikası Prezidentinin 2026-cı il 25 may tarixli Sərəncamı ilə təsdiq edilmiş “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın müzakirəsi ilə bağlı regional müşavirə keçirilib.

Kənd Təsərrüfatı Nazirliyinin məlumatına görə, tədbirdə aidiyyəti dövlət qurumlarının rəsmiləri, eləcə də Ağcabədi, Ağdam, Bərdə, Füzuli və Tərtər rayonlarından olan fermer və sahibkarlar iştirak ediblər.
Müşavirədə vurğulanıb ki, yeni Dövlət Proqramının əsas hədəfi aqrar sektorda məhsuldarlığı, rəqabət qabiliyyətini və ixrac potensialını artırmaq, həmçinin müasir suvarma, emal və logistika infrastrukturunu genişləndirməkdir. Regionun su təminatının yaxşılaşdırılması çərçivəsində bu il 250 min hektara yaxın ərazinin suvarma suyu ilə təmin ediləcəyi və mövcud su infrastrukturunun təkmilləşdiriləcəyi diqqətə çatdırılıb.

Tədbirin yekununda fermerlərin rəy və təklifləri dinlənilib, Dövlət Proqramının uğurla icra olunması və yerli istehsalın artırılması üçün dövlət qurumları, yerli icra hakimiyyətləri və özəl sektor arasında sıx koordinasiyalı fəaliyyətin vacibliyi xüsusi qeyd edilib.