Bu gün Azərbaycanın ən böyük qaz və kondensat yatağı olan “Şahdəniz” üzrə Hasilatın Pay Bölgüsü Sazişinin (HPBS) imzalanmasının 30-cu ildönümüdür.

4 iyun 1996-cı ildə imzalanan Saziş Azərbaycanın müasir enerji strategiyasında yeni mərhələnin əsasını qoyaraq ölkəmizin qaz sənayesinin dayanıqlı inkişafına möhkəm zəmin yaratdı. Layihə Azərbaycanın beynəlxalq enerji bazarlarına inteqrasiyasını sürətləndirdi, ölkəmizin regional və Avropa bazarlarında əsas təbii qaz təchizatçılarından birinə çevrilməsində mühüm rol oynadı.

Məhz “Şahdəniz” layihəsi sayəsində Azərbaycan qaz idxal edən ölkədən qaz ixrac edən ölkəyə çevrildi.

“Şahdəniz-2” mərhələsinin inkişafı hasilat imkanlarını əhəmiyyətli dərəcədə artıraraq Cənub Qaz Dəhlizinin əsas resurs bazasını formalaşdırdı. Bu gün “Şahdəniz” yatağından hasil edilən təbii qaz regiondan Avropaya uzanan strateji enerji körpüsünün mühüm tərkib hissəsinə çevrilib.