Azərbaycanın turizm sənayesinin nümayəndələri Çin Xalq Respublikasının Mədəniyyət və Turizm Nazirliyi, Beynəlxalq Mübadilə və Əməkdaşlıq Bürosu və Ümumdünya Turizm Təşkilatları Alyansı tərəfindən təşkil olunan Çin-Azərbaycan turizm dialoqunda iştirak ediblər.

Dövlət Turizm Agentliyinin məlumatına görə, tədbirdə hər iki ölkənin dövlət və özəl turizm qurumlarının nümayəndələri, beynəlxalq təşkilatların rəsmi şəxsləri və turizm sənayesinin aparıcı ekspertləri iştirak ediblər.

Qeyd olunub ki, yerli turizm potensialının Çin bazarında təşviqini gücləndirmək məqsədilə bu ilin may ayının 29-da Pekində Azərbaycan Turizm Bürosunun rəsmi nümayəndəliyinin açılışı baş tutub.
Əməkdaşlığın inkişafı turist axınının artımı ilə müşayiət olunur. Belə ki, cari ilin yanvar-aprel aylarında Çindən Azərbaycana gələnlərin sayı ötən illə müqayisədə 9,5 faiz artaraq 14 303 nəfər təşkil edib.