"Bakı Enerji Həftəsi" çərçivəsində energetika naziri Pərviz Şahbazov Banqladeşin energetika və mineral ehtiyatlar naziri İqbal Həsən Mahmudla və Almaniyanın "VNG AG" şirkətinin İdarə Heyətinin sədri Ulf Heitmüller ilə enerji sahəsində əməkdaşlıq və gələcək perspektivləri müzakirə edib.

Nazirlikdən verilən məlumata görə, İqbal Həsən Mahmudla görüşdə təchizat mənbələrinin şaxələndirilməsi, neft və LNG tədarükü üzrə əməkdaşlıq imkanları nəzərdən keçirilib, SOCAR ilə Banqladeş şirkətləri arasında tərəfdaşlığın genişləndirilməsi və D-8 formatında əməkdaşlığın vacibliyi vurğulanıb.

"VNG AG" şirkəti ilə isə qaz təchizatı, enerji keçidi və aşağı karbon həlləri ətrafında fikir mübadiləsi aparılıb. Görüşdə Azərbaycanda icra olunan 11 sənaye miqyaslı günəş və külək enerjisi layihəsi, batareya enerji saxlama sistemləri, eləcə də şəbəkənin modernləşdirilməsi xüsusi qeyd edilib. Bu layihələrin daxildə qaza qənaət etməklə ixrac imkanlarını artıracağı bildirilib. Eyni zamanda gələcək enerji sistemində hidrogen və biometanın rolu, həmçinin Azərbaycan, Türkiyə və Avropa istiqamətində elektrik enerjisi interkonnektor layihələrinin əhəmiyyəti dəyərləndirilib.