Azərbaycan Standartlaşdırma İnstitutu (AZSTAND) tekstil məhsullarının tərkibini dəqiq müəyyənləşdirmək, təhlükəsizliyi təmin etmək və beynəlxalq tələblərə uyğunlaşmaq məqsədilə toxuculuq sahəsində tekstil liflərinin kəmiyyət kimyəvi analizinə dair 9 yeni dövlət standartı qəbul edib.

İnstitutun məlumatına görə, "Tekstil sahəsi"nin standartlaşdırması üzrə Texniki Komitənin (AZSTAND/TK 45) təqdimatı ilə qəbul edilən AZS ISO 1833 seriyalı bu standartlar, aseton, natrium sinkat, sulfat turşusu və termiki qızdırılma kimi müxtəlif kimyəvi üsullarla asetat, pambıq, akril, ipək, poliester və asbest kimi lif qarışıqlarının laboratoriya şəraitində dəqiq analizini tənzimləyir.

Bu dövlət standartlarının qəbulunda məqsəd tekstil məhsullarının tərkibinin düzgün və dəqiq müəyyənləşdirilməsi, onların təhlükəsizliyinin təmin olunması və beynəlxalq tələblərə uyğunlaşdırılmasından ibarətdir.

Sözügedən dövlət standartları Standartlaşdırma üzrə normativ sənədlərin Dövlət Fonduna daxil edilib.