Asiya İnkişaf Bankının (AİB-in) infrastruktur və şəhər salınması sektorlarını təmsil edən nümayəndə heyəti Ələt Azad İqtisadi Zonasına (AFEZ) səfər edib.

Görüş zamanı AFEZ Administrasiyasının nümayəndəsi Zonanın regionda mühüm sənaye, logistika və investisiya habı kimi strateji rolu barədə geniş təqdimatla çıxış edib. Nümayəndə heyətinə Zonanın ərazisində aparılan irimiqyaslı infrastruktur işləri, o cümlədən nəqliyyat bağlılığının, kommunal şəbəkələrin, mühəndis sistemlərinin inkişafı və beynəlxalq standartlara uyğun yaradılmış müasir sənaye obyektləri barədə məlumat verilib. Təqdimatda bütün torpaq sahələrinin tam hazır daxili və xarici infrastrukturla, o cümlədən elektrik və su təchizatı, kanalizasiya, telekommunikasiya və giriş yolları ilə təmin olunduğu vurğulanıb. Bundan əlavə, Zona qabaqcıl mühəndis-kommunikasiya sistemləri ilə təchiz edilib.

Səfər çərçivəsində tərəflər gələcək əməkdaşlığın perspektivləri, xüsusilə də Zonanın infrastrukturunun növbəti inkişaf mərhələsinin maliyyələşdirilməsi barədə fikir mübadiləsi aparıblar. Həmçinin AFEZ investorları tərəfindən həyata keçirilən layihələrin dəstəklənməsi və maliyyələşdirilməsinin potensial mexanizmləri diqqət mərkəzində olub. Hər iki tərəf dayanıqlı iqtisadi inkişafa töhfə vermək üçün qarşılıqlı fəaliyyətin gücləndirilməsinin vacibliyini vurğulayıb.