Ələt Azad İqtisadi Zonasının (AFEZ) İdarə Heyətinin sədri Valeh Ələsgərov və Ukraynanın Baş nazirinin müavini Oleksiy Kuleba arasında görüş keçirilib.

V.Ələsgərov Ələt AİZ, onun unikal hüquqi bazası, tam inkişaf etmiş daxili və xarici infrastrukturu, mühəndis-kommunal sistemləri ilə təchiz olunan sənaye torpaq sahələri, bir sıra maliyyə və digər güzəştlər, eləcə də nəqliyyat-loqistika infrastrukturu barədə ətraflı məlumat verib.

O.Kuleba təqdimatın Ukrayna nümayəndə heyətində çox müsbət təəssürat yaratdığını qeyd edərək, Ələt AİZ-in eksteritorial statusunun və müstəqilliyinin onun uğurlu inkişafı üçün möhkəm zəmin yaratdığını vurğulayıb. O, həmçinin istifadəyə hazır zəruri infrastruktura malik sənaye torpaq sahələrinin mövcudluğunun investorlar üçün xüsusi cəlbediciliyini qeyd edib.
Görüşün sonunda tərəflər əməkdaşlığın daha da inkişaf etdirilməsində maraqlı olduqlarını ifadə ediblər.