Azərbaycanda inşa edilən "Laçın" adlı ilk neftdaşıyan tanker sınaqlar üçün dənizə buraxılacaq. "APA-Economics"in məlumatına görə, tankerin tikintisi, demək olar, bitib, hazırda gəmidə tamamlama işləri aparılır. Məlumatda qeyd olunur ki, bu ilin sonunadək tanker tam istifadəyə veriləcək.

Qeyd edək ki, bu ilin fevral ayında "Azərbaycan Xəzər Dəniz Gəmiçiliyi" QSC ilə "Bakı Gəmiqayırma Zavodu" MMC arasında eyni tipli daha iki tankerin tikintisi üçün müqavilə imzalanıb. Bu tip yeni nəsil tankerlərin uzunluğu 141 metr, eni 16,9 metr, hündürlüyü isə 6 metrdir. Dedveyti dənizdə 7,875 T və çayda 5,447 ton olan tankerlər iki ədəd hər biri 1,200 kVt gücə malik "Wartsila" istehsalı mühərriklərlə təchiz edilib. 11 nəfərlik heyətlə idarə olunan bu gəmilər 10 uzellə hərəkət edir. Tankerlərin hər biri xam neft və neft məhsullarının daşınması üçün ümumi tutumu 9,212 kubmetr olan 6 yük tankına malikdir. Unikallığı ilə seçilən bu üzən vasitələrin layihəsini Odessa Dəniz Mühəndisliyi Bürosu hazırlayıb.

"Azərbaycan Xəzər Dəniz Gəmiçiliyi" QSC tərəfindən son 5 ildə 20 müxtəlif təyinatlı gəmi alınaraq istismara verilib. Gəmiçiliyin donanmasının yenilənməsi planı çərçivəsində növbəti 10 ildə 70-dən çox gəminin alınması və Bakı Gəmiqayırma Zavodunda tikintisi planlaşdırılır. Bura tanker, quru yük, bərə, kran, sərnişin, dalğıc, təchizat-yedək, yedək, yanğınsöndürən, torpaqqazan, dibdərinləşdirən gəmilər daxildir.