Bu ilin iyul ayının sonuna Azərbaycanda fəaliyyət göstərən kommersiya banklarının xalis xarici aktivləri 16.441,6 mln. manat təşkil edib və bu göstərici son bir ayda 155,5 mln. manat və ya 1 faiz artıb. Mərkəzi Bankdan verilən məlumata görə, cari ilin əvvəlindən kommersiya banklarının xalis xarici aktivləri 1.128,1 mln. manat və ya 7,4 faiz, son bir ildə isə 1.176,8 mln. manat və ya 7,7 faiz artıb. Ölkədəki kommersiya banklarının xalis daxili aktivləri isə son bir ayda 202,5 mln. manat və ya 2,2 faiz, ilin əvvəlindən 453,7 mln. manat və ya 5,2 faiz, son bir ildə isə 1.737,4 mln. manat və ya 23,3 faiz artaraq bu ilin iyulun sonuna 9.200,6 mln. manat təşkil edib.

Qeyd edək ki, xalis xarici aktivlər kommersiya bankları tərəfindən qeyri-rezidentlərlə xarici valyutada, manatla və qiymətli metallarla aparılmış aktiv-passiv əməliyyatların saldosu, xalis daxili aktivlər isə bank sisteminin mərkəzi hökumət, rezident maliyyə təşkilatları və dövlət idarəetmə orqanları ilə apardığı aktiv-passiv əməliyyatlarının saldosudur.