Bu günədək İpoteka və Kredit Zəmanət Fondunun zəmanəti ilə müvəkkil banklar tərəfindən sahibkarlara 678 milyon manatdan artıq kredit verilib ki, bunun da 124 milyon manatı 2025-ci ilin yanvar-noyabr aylarının payına düşür.

Fondun məlumatına görə, zəmanətlə və faiz subsidiyası hesabına sahibkarlara ayrılan kreditlər hesabına maliyyələşdirilən layihələr çərçivəsində 6 mindən artıq yeni iş yerinin yaradılması nəzərdə tutulub.

Qeyd edək ki, sahibkarların manatla aldıqları kreditlərə zəmanətin və bu kreditlər üzrə hesablanan faizlərə görə subsidiyanın verilməsinə Azərbaycan Prezidentinin 29 noyabr 2017-ci il tarixli 1691 nömrəli Fərmanı ilə başlanılıb.