Azərbaycan Sahibkarlar (İşəgötürənlər) Təşkilatları Milli Konfederasiyasında (ASK) Cənubi Koreyanın aparıcı elektrik və elektron avadanlıq istehsalçısı “HD Hyundai Electric” və gəmiqayırma sahəsində 50 ildən artıq təcrübəyə malik “HD Hyundai Marine Solution” şirkətlərinin nümayəndələri ilə görüş keçirilib.

Konfederasiyanın məlumatına görə, görüşdə Azərbaycanda əməkdaşlıq imkanları, universitetlərlə birgə layihələrin həyata keçirilməsi, tələbələr üçün təqaüd və kredit dəstəyi proqramları, həmçinin enerji və gəmiqayırma sahələrində investisiya perspektivləri barədə fikir mübadiləsi aparılıb.

Şirkət nümayəndələrinə Azərbaycanın tranzit potensialı, Ələt Azad İqtisadi Zonası, Qarabağda mövcud olan investisiya imkanları və sənaye parkları barədə ətraflı məlumat verilib, gələcək əməkdaşlıq perspektivləri müzakirə olunub.