Biznes Mühiti və Beynəlxalq Reytinqlər üzrə Komissiyanın “Effektiv idarəetmə və makroiqtisadi göstəricilər” işçi qrupunun videokonfrans formatında növbəti iclası keçirilib.

Azərbaycan Mərkəzi Bankının (AMB) məlumatına görə, iclasda AMB, Maliyyə Nazirliyi, İqtisadiyyat Nazirliyi, Dövlət Neft Fondu, Dövlət Statistika Komitəsi, Ekologiya və Təbii Sərvətlər Nazirliyi, Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin məsul şəxsləri iştirak edib.

İclasda işçi qrupunun cari il üzrə təsdiq edilən fəaliyyət planının icrası istiqamətində I yarımillikdə görülən işlər barədə hesabatlar dinlənilib. Hesabatlar büdcə şəffaflığının təmin edilməsi, borc dayanıqlılığı, dövlət tənzimlənməsi yükü, monetar azadlıq, Qlobal İnnovasiyalar İndeksi, həmçinin təbii resursların effektiv idarə edilməsi kimi məsələləri əhatə edib.

İşçi qrupunun rəhbəri, Mərkəzi Bankın Pul siyasəti departamentinin direktoru Azər Ələsgərov müzakirələri yekunlaşdıraraq təsdiq edilən fəaliyyət planının icrası istiqamətində işlərin davam etdirilməli olduğunu bildirib. O, görülən işlər barədə məlumatların daha effektiv kommunikasiyasının zəruriliyi barədə iclas iştirakçıları ilə fikirlərini bölüşüb.