Bu ilin beş ayında Azərbaycan ilə İqtisadi Əməkdaşlıq Təşkilatına (ECO) üzv ölkələr arasında ticarət dövriyyəsi 3,5 milyard dollara çatıb. Bu da illik 10 faiz artım deməkdir.

Bu barədə iqtisadiyyat nazirinin birinci müavini Elnur Əliyev Şuşada keçirilən 6-cı ECO biznes-forumunda çıxışı zamanı deyib.

“Azərbaycan üçün ticarət əlaqələri regional inteqrasiyanın əsasını təşkil edir və son illər bu sahədə ölkənin biznes sahəsi üçün müsbət anlar olub. Biz bu dinamikanı ikitərəfli sazişlərin genişləndirilmiş şəbəkəsi ilə davam etdiririk. Azərbaycanın hazırda təşkilata üzv beş ölkə ilə azad ticarət sazişləri və həm Türkiyə, həm də Pakistanla preferensial ticarət sazişləri var. Maneələri azaltmaq və bazarları açmaqla, bu alət ECO regionu boyunca ticarəti daha da gücləndirir”, - deyə E.Əliyev qeyd edib.

Azərbaycan ilə ECO-ya üzv dövlətlər arasında investisiya əməkdaşlığının əhəmiyyətli dərəcədə dəyişə biləcəyini sözlərinə əlavə edən E.Əliyev hazırda ECO ölkələrindən 10 mindən çox şirkətin Azərbaycanda fəal fəaliyyət göstərdiyini vurğulayıb: “1995-ci ildən bəri üzv dövlətlərdən Azərbaycana 22 milyard dollardan çox investisiya qoyulub. Bu, iqtisadiyyatımızın əsas sektorlarının inkişafına töhfə verib”.

AZƏRTAC