Avropa Yenidənqurma və İnkişaf Bankının (AYİB) “Regional İqtisadi Perspektivlər” hesabatının may buraxılışında Azərbaycan iqtisadiyyatının 2025-ci ildə 3 faiz, 2026-cı ildə isə 2,5 faiz artacağı proqnozlaşdırılır.

Hesabata görə, 2024-cü ildə Azərbaycan iqtisadiyyatı qeyri-neft sektorunun aktiv inkişafı və dövlət sərmayələri sayəsində əhəmiyyətli dərəcədə artıb.

2024-cü ildə real ÜDM 2023-cü ildəki 1,4 faizlə müqayisədə 4,1 faiz artıb. Bununla yanaşı, qeyri-neft sektorunda artım 2023-cü ildəki 3,7 faiz ilə müqayisədə 6,2 faiz təşkil edib. Artımın əsas qeyri-neft mənbələri tikinti, İKT, nəqliyyat və turizm sektorları olub. İqtisadi aktivlik real gəlirlərin artımı və infrastruktura investisiyalar hesabına dəstəklənib.

Hesabatda qeyd olunur ki, neft-qaz sektoru 2024-cü ilin martında Avropa ölkələrinə tədarük üçün qaz hasilatının artması fonunda yenidən artım tempinə qayıdıb.

Real ÜDM artımının 2025-ci ildə 3 faiz, 2026-cı ildə isə 2,5 faiz olacağı proqnozlaşdırılır. Artım iqtisadiyyatın qeyri-neft sektorunun davamlı genişlənməsi və dayanıqlı dövlət investisiyaları ilə dəstəklənəcək. AYİB, həmçinin, ticarət siyasətində qeyri-müəyyənliklər, xarici tələbin azalması və regional normallaşma proseslərində potensial çətinliklər kontekstində iqtisadiyyatın neft və qaz qiymətlərindəki dəyişikliklərə həssaslığını qeyd edir.

Hesabatda qeyd olunur ki, ortamüddətli perspektivdə Çini Avropa ilə birləşdirən Orta Dəhliz ticarət yollarının və investisiya axınının yaradılmasına kömək edə bilər ki, bu da Azərbaycanın nəqliyyat və logistika sektorları üçün yeni imkanlar açacaq.