Beynəlxalq Valyuta Fondu (BVF) Azərbaycanın 2025-ci ildə iqtisadi artımını 3,5 faiz səviyyəsində gözləyir. Bu, fondun ötən ilin oktyabr ayındakı proqnozundan 1 faiz bəndi yüksəkdir.

BVF qeyri-neft-qaz sektorunda artımın 4,5 faizə çatacağını gözləyir.

Fondun hesabatına əsasən, 2025-ci ildə Azərbaycanın nominal ÜDM-i 134 milyard manat təşkil edəcək və 2029-cu ilə qədər mərhələli şəkildə artaraq 162,1 milyard manata yüksələcək. Qeyri-neft ÜDM-nin isə 94,67 milyard manatdan 127,9 milyard manata qədər artacağı proqnozlaşdırılır.

BVF ortamüddətli dövrdə inflyasiyanın Azərbaycan Mərkəzi Bankının hədəflədiyi 4±2 faiz diapazonunda qalacağını gözləyir.

Fond, həmçinin, Azərbaycanın büdcə şəffaflığının artırılması sahəsində böyük uğurlarını qeyd edib. Azərbaycan "Açıq büdcə – 2023" hesabatında 125 ölkə arasında 23-cü yeri tutub.

BVF Azərbaycanın bank sistemindəki inkişafı da vurğulayıb. Kreditləşmənin artım tempi 2024-cü ildə illik müqayisədə 22 faizə yüksəlib, halbuki 2023-cü ildə bu göstərici 19 faiz olub. Artımı, əsasən, bank olmayan kredit təşkilatlarının aktivləşməsi təmin edib. Kreditləşmənin əsas hərəkətverici qüvvəsi ev təsərrüfatları və hüquqi şəxslər olub, xüsusilə sənaye və emal sahələrinin payı ümumi kredit həcmində 5 faizdən 8 faizə yüksəlib.