İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Metrologiya İnstitutunda (AzMİ) ölkədə ölçmə imkanlarının genişləndirilməsi istiqamətində həyata keçirilən tədbirlər çərçivəsində həcm, tibb, müqavimət, vaxt və tezlik, paylanma parametrləri və radiotezlik gücünün ölçmələri üzrə 5 yeni etalon laboratoriyasının açılışı olub.

Tədbirdə Azərbaycan Respublikası iqtisadiyyat nazirinin müavini Səməd Bəşirli, Türkiyə Respublikasının sənaye və texnologiya nazirinin müavini Muhammet Kasım Gönüllü, Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli, Çəkilər və Ölçülər üzrə Beynəlxalq Büronun (BIPM - International Bureau of Weights and Measures) direktoru Dr.Martin J.T. Milton, Qanunverici Metrologiya üzrə Beynəlxalq Komitənin (CIML - International Committee of Legal Metrology) prezidenti Dr.Bobcozef Metyu, Türkiyə Respublikasının Milli Metrologiya İnstitutunun (TÜBİTAK UME) rəhbəri Mustafa Çetintaş və Azərbaycan Metrologiya İnstitutunun Baş direktoru Xamis Seyranov çıxış ediblər.

Çıxışlarda iqtisadi subyektlərin metroloji ehtiyaclarının qarşılanması, cihazlara olan tələbatın ödənilməsi istiqamətində müasir avadanlıqlarla təchiz olunan laboratoriyaların önəmindən bəhs edilib, yeni laboratoriya şəbəkəsində yoxlanılma və kalibrlənmə işinin təşkili zamanı beynəlxalq tələblərə uyğun metodların tətbiqi ilə metroloji xidmətin kəmiyyət və keyfiyyətinin artacağı vurğulanıb.

Tədbir çərçivəsində yeni istifadəyə verilən müasir laboratoriyaların maddi-texniki bazası barədə məlumat verilib. Bildirilib ki, həcm ölçmələri laboratoriyasında mayelərlə işləyərkən potensial xətanı azaltmaq, tibb ölçmələri laboratoriyasında sahə üzrə dəqiq ölçmələri həyata keçirmək, vaxt və tezlik ölçmələri laboratoriyasında milli vaxt kəmiyyət vahidi etalonu sayəsində zamanı sinxronlaşdırmaq mümkün olacaq. Həmçinin paylanma parametrləri və radiotezlik gücünün ölçmələri laboratoriyasında aviasiya, hərbi sənaye və rabitə sistemlərinin, müqavimət ölçmələri laboratoriyasında isə energetika sahəsində istifadə olunan yüksək dəqiqlikli müqavimət ölçü cihazlarınının yoxlanılması və kalibrlənməsi həyata keçiriləcək.

Sonda “Yaşıl dünya naminə həmrəylik ili” çərçivəsində ağacəkmə aksiyası keçirilib.