Azərbaycanda lavanda şitilinin istehsalı və satışı sahəsində fəaliyyət göstərən "The Best Choice" MMC Özbəkistan bazarına çıxmağa hazırlaşır. Bunu “Azərbaycan iqtisadiyyatı” Teleqram kanalına MMC-nin təsisçisi və direktoru Elbrus Əhmədov deyib.

Onun sözlərinə görə, Özbəkistana 15 hektarlıq ərazidə əkilmək üçün təxminən 150 min ədəd şitilin ixrac edilməsi məqsədilə danışıqlar aparılır. İxrac bu ilin noyabr ayında reallaşdırıla bilər.

"The Best Choice" MMC 2023-cü ildə 250 min lavanda şitili satıb. Şirkətin əsas alıcıları Azərbaycan bazarındakı fiziki və hüquqi şəxslər olub.

E.Əhmədov əlavə edib ki, suvarmaya ehtiyac olmadığı, eyni zamanda arıçılıq üçün əsas qida bazalarından biri olduğu və son dövrlərdə işğaldan azad edilmiş ərazilərdə arıcılığın inkişafına önəm verildiyi üçün lavanda əkinlərinin salınmasına maraq getcikcə artır.

Şirkət bu mövsümdə satışa 1,5 milyon ədəd şitil çıxaracaq. Lavandanın əkilməsi üçün əsas mövsüm oktyabrdan dekabrın əvvəlinədək, eyni zamanda fevraldan aprelədək olan dövrdür.

Xatırladaq ki, “The Best Choice” MMC 2018-ci ildən Azərbaycanda kənd təsərrüfatı sahəsində yeni istiqamət olan tibbi aromatik bitkilərin yetişdirilməsi ilə məşğul olur. Şirkət fəaliyyətini Qəbələ rayonunda 30 hektar ərazidə lavanda (Angustifolia), nanə (Peppermint) və melissa kimi tibbi aromatik bitkilərin yetişdirilməsi, bu bitkilərdən alınan yağların istehsalı və satışı, eyni zamanda lavanda tinglərinin yetişdirilməsi üzərində qurub.

İlhamə İSABALAYEVA