“Azərxalça” ASC İstanbulda təşkil olunan 15-ci Beynəlxalq “Şərq xalçaları” konfransında iştirak edib.

QSC-dən verilən məlumata görə, konfransın əsas mövzusu “Şərq xalçaşünaslığı 2024: Xalçaçılıq və xalça kolleksiyasının keçmişi və gələcəyi” olub. Konfransda iki əsas sahəyə xüsusi diqqət yetirilib: “Tarixi xalçalar və tekstil” və “Müasir incəsənət, dizayn və yeni istehsalat”.

Tədbirdə müxtəlif mövzularda iştirak etmək üçün 4 qitə, 20 ölkədən ümumilikdə 76 təklif daxil olub.

Konfransda “Azərxalça”nın İdarə Heyətinin sədri Emin Məmmədov da iştirak edib. O, “Azərbaycan xalçaçılıq sənətində mədəni irsin davamlı inkişafı - üç nümunə əsasında” mövzusunda çıxış edib. Çıxış zamanı müasir dövrdə ASC-nin Azərbaycanın aparıcı və ən böyük xalça istehsalçısı kimi fəaliyyəti, istehsalatla yanaşı, mədəni irsin qorunması, müasir dövrə, zövqə və interyerə uyğunlaşdırılması, qədim köklər, adət- ənənələr əsasında çağdaş tələblərə cavab vermə qaydalarından söz açılıb.