Azərbaycanla Böyük Britaniya arasında kənd təsərrüfatı sahəsində birgə İşçi Qrupun yaradılması, Anlaşma Memorandumunun imzalanması və fəaliyyət planının hazırlanması müzakirə olunub.

Kənd Təsərrüfatı Nazirliyindən verilən məlumata görə, əməkdaşlıq istiqamətlərinə nazir Məcnun Məmmədovun bu ölkənin səfiri Fergus Auld ilə görüşü zamanı toxunulub.

Görüşdə kənd təsərrüfatı və qida məhsullarının ticarət dövriyyəsinin artırılması, torpaq və su resurslarından səmərəli istifadə, kənd təsərrüfatının rəqəmsallaşdırılması, bu sahədə ən müasir texnologiyaların transferi, heyvandarlığın cins tərkibinin yaxşılaşdırılmasında Böyük Britaniya mütəxəssislərinin dəstəyi, aqrar sektorda elmi-tədqiqat və təhsil sahələrində təcrübə proqramlarının həyata keçirilmə məsələləri nəzərdən keçirilib.

İki ölkə arasında kənd təsərrüfatı sahəsində qarşılıqlı əlaqələrin genişləndirilməsi üçün böyük potensialın olduğu vurğulanıb.