2024-cü ilin fevral ayından başlayaraq işğaldan azad olunmuş ərazilər üzrə güzəştli kreditlərin yeni mexanizmlə verilməsi nəzərdə tutulur.

“vergiler.az” xəbər verir ki, bunu Sahibkarlığın İnkişafı Fondunun (SİF) İdarə Heyətinin sədri Osman Xaliyev bu gün keçirdiyi mətbuat konfransında deyib. Onun sözlərinə görə, işğaldan azad olunmuş ərazilərdə 4 layihəyə ayrılmış güzəştli kreditlərin ümumi məbləği 11,5 milyon manat olub.

O.Xaliyev qeyd edib ki, 2023-cü ildə Naxçıvan Muxtar Respublikası ərazisində fəaliyyət göstərən 27 sahibkar ümumilikdə 2,2 milyon manat güzəştli kreditdən yararlanıb.

SİF sədri əlavə edib ki, ötən il güzəştli kreditlərin layihə sayı üzrə 99,8%-i, kreditin məbləği üzrə isə 91,1%-i mikro, kiçik və orta sahibkarlıq subyektlərinə verilib.