Bu ilin yanvar-noyabr ayları ərzində Dövlət Gömrük Komitəsinin (DGK) xətti ilə dövlət büdcəsinə 5,71 milyard manat daxil olub ki, bu da ötən ilin müvafiq dövrü ilə müqayisədə 12,3 faiz çoxdur.

"Azərbaycan iqtisadiyyatı" Teleqram kanalının Komitənin dərc etdiyi göstəricilər əsasında apardığı hesablamalara görə, hesabat dövründə dövlət büdcəsinə daxil olan gömrük rüsumlarının həcmi ötən ilin analoji dövrü ilə müqayisədə 18,3 faiz artaraq 1,49 milyard manat təşkil edib.

ƏDV üzrə daxilolmalar isə 9,8 faiz artaraq 3,97 milyard manata bərabər olub. Aksizlər üzrə cari ilin 11 ayında daxilolmalar 37,4 faiz artaraq 205,9 milyon manat təşkil edib.

Yol vergisi üzrə daxilolmaların həcmi 39,2 milyon manat təşkil edib ki, bu da ötən ilin analoji dövründə qeydə alınan göstəricidən 31,5 faiz azdır.