Azərbaycan etibarlılıq, təchizat və enerji resursları baxımından həm Avropa-Qafqaz-Asiya, həm də Şərq-Qərb nəqliyyat dəhlizlərinin ən aparıcı ölkələrindən biridir. Bu fikri iqtisadçı Eldəniz Əmirov Gürcüstanda keçirilən 4-cü İpək Yolu Beynəlxalq Forumunun əhəmiyyətini “vergiler.az”a şərh edərkən səsləndirib. Onun sözlərinə görə, iri logistika layihələrinin təkmilləşdirilməsi, irəli sürülən təkliflərin müzakirəsi üçün bu cür tədbirlərə böyük ehtiyac var: “Beynəlxalq Forumda əsas müzakirə mövzularından biri də enerji təminatı ilə bağlı olub. Gürcüstan, Azərbaycan, Rumıniya və Macarıstan Buxarest şəhərində bununla bağlı anlaşma imzalayıblar. Bu anlaşmaya görə, Azərbaycanda və Gürcüstanda alternativ enerji resursları hesabına istehsal ediləcək elektrik enerjisi Qara dənizin dibi ilə Avropaya nəql olunacaq. Bu baxımdan, Forumda həmin dörd ölkənin istirakı vacib idi. Çünki layihə çox genişdir və böyük resurs tələb edir”.

E.Əmirov Avropa İttifaqına daxil olan Rumıniya və Macarıstanın bu layihəyə qoşulmasını müsbət qiymətləndirib. Regiondan keçən bütün logistika layihələrində Azərbaycanın mühüm rol oynadığını xatırladan iqtisadçı əlavə edib ki, sərnişin daşımalarında da Qafqaz üzərindən keçən marşrut üzrə aktivlik nəzərdə tutulur.