Trans-Anadolu Təbii Qaz Boru Kəməri (TANAP) və Trans-Adriatik Boru Kəməri (TAP) İtaliyanın qaza olan tələbatının 10%-dən çoxunu təmin etdiyi üçün Azərbaycan-İtaliya ikitərəfli enerji əməkdaşlığını və İtaliyanın enerji təhlükəsizliyini gücləndirən mühüm amillərdir.

Bu sözləri “vergiler.az”a Qafqaz və Mərkəzi Asiya üzrə ekspert Fabrissi Vielmin deyib.

Onun sözlərinə görə, Avropa İttifaqı (Aİ) Rusiyanın enerji resurslarının Avropaya ixracına qarşı sanksiyalar tətbiq etdikdən sonra Azərbaycan Avropa üçün çox vacib tərəfdaşa çevrilib.

“TAP vasitəsilə Avropaya nəql olunan qazın iki dəfə artacağı ilə bağlı gözləntilər var. Bu perspektivlərə gəlincə, bizdə kifayət qədər yayılmış futbol metaforasından istifadə etsək, meydandakı top Azərbaycan tərəfindədir.

Demək istəyirəm ki, Azərbaycan tərəfi bu kəmərlərin inkişafı üçün investisiya resurslarını səfərbər edə biləcək əsas oyunçu olacaq”, - ekspert bildirib.

“Digər tərəfdən, Özbəkistan qaz hasilat imkanlarını inkişaf etdirir və beynəlxalq iştirakını diversifikasiya etməyə hazırdır. İstənilən halda, Xəzər hövzəsinin enerji axınlarını toplamaq üçün lazımi sahil infrastrukturuna investisiyalar tələb olunacaq”, - deyə ekspert yekunlaşdırıb.

Tamilla MƏMMƏDOVA