Əmək və əhalinin sosial müdafiəsi naziri Sahil Babayev "Dövlət sahibkarın ən yaxşı tərəfdaşıdır" adlı konfransda çıxış edərkən deyib ki, bu ilin ilk 5 ayında bağlanmış əmək müqavilələrinin sayı 95 mindən çox artıb. "Ötən 5 ayda 1 illik nəzərdə tutulan nəticəyə çatmışıq. 95 mindən artıq olan müqavilələrin 70 faizi özəl sektorun payına düşür. Bu onu göstərir ki, Azərbaycanda sahibkarlar dövlətin təşkil etdiyi güzəştlərdən yararlandılar, öz öhdələrinə düşən addımları atdılar. Düşünürəm ki, bu dinamika davam edərsə, ölkənin əmək və məşğulluq bazarında ciddi şəkildə təkmilləşmə baş verəcək".

S.Babayev bu ilin 5 ayında əməkhaqqı fondunda da 17-18 faizlik artım olduğunu vurğulayıb. Bunun çox ciddi göstərici olduğunu deyən nazir ölkə üzrə əməkhaqqı fondunda bu qədər artımın özəl sektorda fəaliyyət göstərən sahibkarların şəffaf işləməsinin göstəricisi kimi dəyərləndirib.
Ölkənin əmək bazarının vəziyyətinə və məşğulluq strategiyasının icrası istiqamətində görülən işlərə də toxunan nazirin sözlərinə görə, Azərbaycanda əmək bazarı üzrə Milli Observatoriyanın yaradılması planlaşdırılır. Qurumun əsas işi əmək resursları ilə əmək bazarının tələbləri arasında proqnozlaşdırma və əlaqələndirmə olacaq: "Biz inanırıq ki, işin bu şəkildə təşkili dövlət qurumlarının iştirakı ilə sahibkarlarımızın ehtiyaclarını və imkanlarını nəzərə alaraq, əmək bazarında daha əlaqələndirilmiş işi təmin edə biləcəyik".

Fərqanə ALLAHVERDİQIZI