PwC audit şirkəti 26-cı qlobal illik CEO sorğusunun Azərbaycan üzrə hesabatını dərc edib.

“Azərbaycan iqtisadiyyatı” Teleqram kanalı hesabata istinadən xəbər verir ki, sorğuda iştirak edən CEO-ların 69 faizi ölkənin 2023-cü il üçün inkişaf perspektivləri ilə bağlı nikbin olaraq qalırlar.

Yerli şirkət rəhbərləri qlobal iqtisadiyyatla bağlı daha az optimistdirlər. Respondentlərin 52 faizi növbəti 12 ay ərzində qlobal iqtisadi artımın yavaşlamasını proqnozlaşdırdıqlarını bildiriblər.

Beynəlxalq bazarda fəaliyyət göstərən əksər şirkət rəhbərləri Türkiyə (28 faiz), Rusiya (15 faiz), Gürcüstan (12 faiz), Qazaxıstan (10 faiz) kimi ölkələri öz müəssisələrinin gəlirlərinin artması üçün vacib hesab edirlər. Siyahıya həmçinin ABŞ (7 faiz), BƏƏ (7 faiz), Böyük Britaniya (6 faiz), Almaniya (6 faiz), Çin (5 faiz) daxildir.

Rəhbərlərin 40 faizi şirkətlərinin 12 ay, 41 faizi isə üç il ərzində gəlirlərinin artacağına əmindir.

Azərbaycanda getdikcə daha çox şirkət ekoloji problemlər haqqında düşünür. Rəhbər işçilərin 37 faizi ekoloji cəhətdən təmiz məhsullar üzərində işlədiklərini və ya istehsal etməyi planlaşdırdıqlarını, sorğuda iştirak edənlərin 12 faizi artıq belə məhsullar istehsal etdiyini bildirib.

Respondentlərin 30 faizi zərərli emissiyaların azaldılmasına yönəlmiş strategiyanı planlaşdırır və ya üzərində işləyir. Analoji strategiya artıq respondentlərin 18 faizi tərəfindən həyata keçirilir.

Hesabatla qeyd edilən linkdən tanış olmaq olar: https://pwc.to/3Mlol0i