Bu ilin aprelində Qazaxıstan Bakı limanı istiqamətində neft nəqlinin həcmini mart ayı ilə müqayisədə 75 faiz artırıb.

“vergiler.az” “Kaztransoil”ə istinadən xəbər verir ki, ötən ay bu istiqamətdə 152,4 min ton neft göndərilib. Mart ayında isə bu rəqəm 87 min ton təşkil edib. Bundan əlavə, hesabat dövründə Aktau limanından Mahaçqala limanı istiqamətində 160,2 min ton neft yola salınıb.

Apreldə Qazaxıstan ixrac neftinin Aktau limanından nəqlinin həcmi mart ayı ilə müqayisədə 60,5 min ton və ya 24 faiz artaraq 312,6 min ton təşkil edib.

Xatırladaq ki, Qazaxıstan Prezidenti Kasım-Jomart Tokayevin ötən il Transxəzər dəhlizi ilə neft nəqlinin artırılması barədə verdiyi göstərişə uyğun olaraq, “KazMunayQaz” SC və SOCAR arasında “Tengiz” yatağından Bakı-Tbilisi-Ceyhan neft kəməri ilə ildə 1,5 milyon ton neftin nəqlini nəzərdə tutan müqavilə imzalanıb.