İplik istehsalı ilə məşğul olan "Mingəçevir Tekstil" Məhdud Məsuliyyətli Cəmiyyəti (MMC) bu il ərzində mövcud istehsal fəaliyyətini 15-20 faiz genişləndirməyi planlaşdırır.

Bunu “Azərbaycan iqtisadiyyatı” Teleqram kanalına "Mingəçevir Tekstil" MMC-nin direktoru Əli Əsədov deyib.

Onun sözlərinə görə, istehsalın genişləndirilməsi üçün təqribən 11 milyon manat investisiya yatırılıb. Bu məqsədlə tələb olunan avadanlıqların bir hissəsi artıq Almaniyadan ölkəyə gətirilib. Qalan avadanlıqların isə mayda gətirilməsi gözlənilir. Yaxın vaxtlarda fabrikdə yeni avadanlıqların quraşdırılmasına başlanacaq. İstehsalın genişləndirilməsi nəticəsində 10-15 yeni iş yeri açılacaq.

Ə.Əsədov əlavə edib ki, istehsal etdikləri ipliklərin 95 faizi xaricə - əsasən, Türkiyə və Rusiyaya ixrac edilir.

Qeyd edək ki, "Mingəçevir Tekstil" MMC Mingəçevir Sənaye Parkının rezidenti kimi qeydiyyata alınıb. Fabrikdə Almaniya, İsveçrə, Yaponiya və Türkiyə texnologiyaları əsasında "Ring" və "Open End" üsulu ilə iplik istehsal edilir.