2023-cü ilin dövlət büdcəsində kənd təsərrüfatı bölməsi üzrə 1 202,1 mln. manat vəsait ayrılması nəzərdə tutulub.

“vergiler.az” Maliyyə Nazirliyinin hazırladığı 2023-cü ilin dövlət və icmal büdcələri ilə bağlı məlumatları özündə birləşdirən “Vətəndaşın büdcə bələdçisi”nə istinadən xəbər verir ki, bu, 2022-ci illə müqayisədə 204,8 milyon manat və ya 20,5 faiz çoxdur.

İşğaldan azad olunmuş ərazilərdə yeni torpaqların əkin dövriyyəsinə cəlb edilməsi, dünya miqyasında əhalinin gündəlik tələbatına daxil olan bir sıra ərzaq və qeyri-ərzaq məhsullarının qiymətinin artım dinamikası da nəzərə alınmaqla Azərbaycanda ərzaq təhlükəsizliyi tədbirləri üçün 625,2 mln. manat vəsait proqnozlaşdırılıb.

Ölkənin ərzaq təhlükəsizliyinin təmin edilməsi, idxal olunan buğdadan asılılığın azaldılması və yeni tənzimləmə mexanizmlərinin yaradılması hesabına ölkənin ərzaqlıq buğda ilə özünütəminetmə səviyyəsinin yüksəldilməsi sahəsində tədbirlərin həyata keçirilməsi məqsədilə 180 mln. manat vəsait ayrılacaq.